Футбол. Чэмпіянат Беларусі. Другая ліга. Агляд 18-га туру

Пасля невялічкага перапынку аднавіліся гульні ў айчыннай 2-ой лізе. Да канца чэмпіянату трэба правесці яшчэ цэлы круг, таму ўсё можа памяняцца. Пары 18-га туру дублявалі гульні 1-ага, і тут можна знайсці некалькі вельмі цікавых зменаў. Так што не трэба “Гарадзеі” аж цяпер думаць пра першую лігу – усё можа перавярнуцца.

.

Адзначаючы вынікі туру, варта згадаць матч “Вігвама” са Смалявічаў з “ХБК-2” з Гомля. У першым кругу смалявічцы абгулялі суперніка ў яго лагавішчы 2:0. Цяпер жа “Вігвам” з кожным месяцам паказвае ўсё больш бедную гульню, і нарэшце не змог перагуляць дома яўнага аўтсайдэра – 0:0. Яшчэ ў першым туры па-майстэрску згуляў шклоўскі “Спартак”, калі выйграў у “Асіповічаў” 3:0. Аднак бліжэй да сярэдзіны кругу шклаўчане сталі рэгрэсаваць, падобная тэндэнцыя захоўвалася і ў канцы першай паловы чэмпіянату, таму перамога над “Асіповічамі” на іх полі з тым жа вынікам у 18-м туры ў лепшым сэнсе шакавала прыхільнікаў клуба.

.

“Орша” ў першым туры была разгромлена перад роднымі трыбунамі “Вертыкаллю” з Калінкавічаў 1:4. Хто мог падумаць, што аршанцы здолеюць перамагчы суперніка ў 18-м, хай тыя ўжо даўно праваліліся ў глыбіні сярэдзіны табліцы? А здолелі! Спачатку Піваровіч забіў у свае вароты, але потым госці вызначыліся тройчы: удары Жалезнікава, Алейнікава і Хоміча прынеслі важную перамогу аршанцам.

.

А самыя вялікія пературбацыі ў другой лізе адбываюцца з “Зоркай-БДУ”. Яшчэ ў першым афіцыйным матчы сезону мінчане ва ўпартай барацьбе прайгралі слонімскаму “Белтрансгазу” 2:3. Цяпер жа сталічныя футбалісты не палічылі слонімцаў за сапернікаў і разарвалі іх 5:0! Прычым усе пяць галоў забіваліся рознымі людзьмі! І толькі адзін з пенальці. Такім чынам, “Зорка-БДУ” атрымала ў 18-м туры толькі 7-ю перамогу, затое – увага! – 4-ю запар! І ўсе гэныя чатыры перамогі буйныя! Раней “Зорка-БДУ” граміла “ХБК-2” 4:0, “Спартак” 5:1, “Оршу” 4:0. З такімі вынікамі “Зорка” паднялася ўжо на 9-ю пазіцыю, а была ж адной з апошніх!

.

“Бяроза-2010”, як і меркавалася, працягнула пераможны марш на самы верх, перагуляўшы “Гомель-2” 2:1. Прычым бярозаўцы дазволілі гаспадарам выйсці наперад, але затым паціху прыбралі рычагі гульні да сябе і двума стрэламі дамагліся выйгрышу. Цяпер “Бяроза-2010” ужо 5-я і толкі для статыстыкі і кантрасту можна ўзгадваць вынік першага туру, у якім бярозаўцы на родным траўніку саступілі таму ж “Гомелю-2”.

.

“Слуцкцукар” зусім не жадае здавацца і хоча адабраць першынство ў “Гарадзеі”. На гэты раз случакі перамаглі “на нішто” “Жлобін” 6:0! Змаганне доўжыцца яшчэ.

.

Ну і, нарэшце, два самых важных паядынкі туру. “Маладзечна” – “Клечаск”. Маладзечанцы нягледзячы на радок у сярэдзіне табліцы ўсё адно ўвасабляюць небяспеку для лідараў. Тут, здавалася б, небяспека прайшла па заканчэнні тэрміну, гол у якім лічыцца хуткім. Ужо на першых секундах(!) Клачкоў вывеў “Клечаск” наперад, на 19-й хвіліне пасля дакладнага ўдару Давыдзенкі, супраціў гаспадароў, паводле задумы госцей мусіў скончыцца. Але не такімі простымі аказаліся яны, Лужынскі і Дараховіч хутка прымусілі саперніка падумаць над тым, каму яны навязваюць супраціў. І ўсё ж мацнейшымі аказаліся футбалісты “Клечаска”. Гол Статуева вырашыў лёс матчу – 3:2 на карысць “Клечаска”. У маладзечанцаў засталіся некаторыя прэтэнзіі да арбітраў, датычныя вызначэння афсайду, але ўсё ўжо ў гісторыі.

.

І, нарэшце, у 18-м туры “Гомельчыгункатранс” прагнуў абгрунтаваць свае прэтэнзіі на лідарскія пазіцыі. Не атрымалася. “Гарадзея” выступіла традыцыйна з пазіцыі сілы, а ў чыгуначнікаў не знайшлося супрацьдзеі. У выніку дзёрзкі “прэтэндэнт” упаў пад прэсам – 1:5. Прычым дубль у гэтай сустрэчы аформіў Уладзімір Макоўскі, які сваім жа дублем у першым кругу прынес над той жа камандай перамогу 2:0.

.

У 19-м туры “Гомельчыгункатранс” будзе мець троху меней сур’ёзнага праціўніка – “Бярозу-2010”. Абодва клубы падымаліся наверх, да таго ж бярозаўцы з самага “склепу”. А “Гарадзея” ў наступным матчы спадзяецца на яшчэ адзін удалы “майстар-клас”, апанентам будзе зноў “імклівы” клуб, які як жаўрук шпарка падымаецца ў нябёсы – “Зока-БДУ”.

.

Аўтар: Арцём Сізінцаў