20 тур першае лігі меў адразу некалькі займальных матчаў. Не заўсёды сустрэчы штосьці вырашалі, і тым не меней за імі было цікава назіраць.
.
У яўнага лідара чэмпіянату – “Гомеля” быў няпросты выезд у Мікашэвічы. “Граніт” прагнуў набраць тры ачкі, але гол Цімашэнкі ўсё ж прынес вікторыю гасцям. СКВІЧ не ўтрымаў другі радок, саступіўшы “Рудзенску”. Зноў жа адзіны гол на сустрэчу правёў 23-гадовы абаронца “Рудзенска” Шуцкі. На другі радок вярнуліся землякі “Гомеля” – “ХБК”, якія з лікам 1:0 (ізноў!) перамаглі “Смаргонь”. Пераможны гол на рахунку Марозава.
.
Усіх аматараў валідольных канцовак парадаваў матч “Славіі-Мазыр” супраць “Хіміка”. Дашук забіў надта непрыемны гол у вароты мазыранаў перад самым свістком на перапынак. У другім тайме забіць маглі і тыя і другія, але стала здавацца, што галоў болей не будзе. Калі Токарскі забіў на другой дададзенай хвіліне мяч у адказ, прыхільнікі “Славіі” ўздыхнулі – ну, дзякуй Богу, нічыя! Але праз якую хвіліну забіў яшчэ і Бардок, “Славія” перамагла 2:1, але лепей не згадваць адзін вялікі матч, дзе сцэнар быў такі ж, бо яго ўжо зацёрлі да дзірак, няхай такая канцоўка і насамрэч бывае надзвычай рэдкай. Пасля дадзенай вырванай перамогі “Славія” наўрад ці апусціцца ў дывізіён ніжэй ад цяперашняга, а калі зірнуць на турнірнае становішча, дык наогул няма вялікіх турботаў – клуб узляцеў ажно на 6-е месца!
.
Лік 1:0 стаў самым папулярным у туры. Так згулялі не толькі лідары, такі ж вынік быў зафіксаваны ў сустрэчах “Баранавічаў” і “Вераса” на карысць першых і “Ліды” з “Ведрыч-97”. У дадзеным паядынку вырашальным быў гол Дабравольскага на 11-й хвіліне. “Ліда” паспяхова скарысталася шанцам, чаго не здолеў зрабіць рэчыцкі клуб. Цяпер “Ліда” альбо рэальна ўключаецца ў барацьбу за выжыванне, хоць і застаецца пакуль на ніжэйшым радку альбо проста зацягвае за сабою рэчычанаў, якім перамога ў матчы была не менш неабходнай. Тым болей што слонімскі “Камунальнік” саступіў у чарговы раз, паездка ў Полацк завяршылася з лікам 1:3, прычым драматызм і акалічнасці былі ўнікальныя. Ужо на 8-й хвіліне Есіпёнак зрэзаў мяч у свае вароты – палачане выйшлі наперад. На 42-й хвіліне тое ж самае паўтарае Шэлег! 2:0 на карысць “Полацка”! На старце другога тайму побач са сваімі ўладараннямі памыляюцца ўжо палачане, але паспяваюць парушыць правілы – пенальці. Шанец не губляе Нарковіч – 2:1. Але на гол слонімскага форварда голам адказвае форвард полацкі – Юрый Алешчанка. І што адметна – таксама з пенальці. 3:1 – “Полацк” святкуе перамогу.
.
І нарэшце, адзначым, што сваю чорную паласу працягнула пінская “Хваля”. Дубль Козіча прынес гродзенскаму “Белкарду” вікторыю ў Пінску.
.
Аўтар: Арцём Сізінцаў
| Команда | М | В | Н | П | РМ | О | |
|---|---|---|---|---|---|---|---|
| 1 | Гомель | 30 | 27 | 1 | 2 | 80-16 | 82 |
| 2 | СКВИЧ (Минск) | 30 | 17 | 7 | 6 | 52-21 | 58 |
| 3 | ДСК-Гомель | 30 | 17 | 7 | 6 | 52-26 | 58 |
| 4 | Гранит (Микашевичи) | 30 | 16 | 8 | 6 | 52-23 | 56 |
| 5 | Руденск | 30 | 12 | 7 | 11 | 37-39 | 43 |
| 6 | Барановичи | 30 | 11 | 10 | 9 | 31-37 | 43 |
| 7 | Полоцк | 30 | 9 | 12 | 9 | 38-34 | 39 |
| 8 | Химик (Светлогорск) | 30 | 10 | 7 | 13 | 37-44 | 37 |
| 9 | Славия-Мозырь | 30 | 10 | 7 | 13 | 33-44 | 37 |
| 10 | Верас (Несвиж) | 30 | 9 | 8 | 13 | 31-39 | 35 |
| 11 | Волна (Пинск) | 30 | 11 | 2 | 17 | 31-48 | 35 |
| 12 | Сморгонь | 30 | 8 | 8 | 14 | 33-43 | 32 |
| 13 | Белкард (Гродно) | 30 | 8 | 6 | 16 | 25-40 | 30 |
| 14 | Ведрич-97 (Речица) | 30 | 8 | 6 | 16 | 29-46 | 30 |
| 15 | Коммунальник (Слоним) | 30 | 5 | 13 | 12 | 23-48 | 28 |
| 16 | Лида | 30 | 4 | 7 | 19 | 23-59 | 19 |