Агляд чэмпіянату Беларусі ў другой лізе. 26 тур

26 гульнявы дзень хоць і не меў асабліва запеклых супрацьстаянняў, аказаўся адным з найцікавейшых за апошні час.

.

Нельга пакінуць па-за ўвагай другую запар паразу “Бярозы-2010” ад каманды з сярэдзіны табліцы. Прычым нетрывалай сярэдзіны. “Белтрансгаз” тварыў на вачох роднай слонімскай публікі ўсё, што хацеў. У першай палове госці хоць неяк трымаліся, затым пасыпаліся. 4:0 – такіх яскравых і буйных перамог у гісторыі “Белтрансгаза” налічваецца мала.

.

Нечакана вынікова на сваім полі згуляў “Спартак”. Шклоўская публіка была агаломшана бліскучай гульнёй свайго клуба яшчэ пушчэй за слонімскую! “Жлобін” быў раздушаны 8:2! Прычым у чэмпіянаце ўзнік яшчэ адзін пэнта-трык. Адзіны дагэтуль належаў Юрыю Сыраквашку з “Гарадзеі”, цяпер яго дагнаў Сяргей Філіпаў са “Спартака”. Пагадзіцеся, нават хэт-трыкі бываюць тут рэдка, а два пэнта-трыкі, нават не покеры! за адзін чэмпіянат – сапраўды шмат. А шклаўчанаў пасля такога можна назваць самай непрадказальнай камандай другой лігі. Зусім нядаўна яна атрымала прабоіну ад “Гарадзеі” 1:9, а вось тут перамога 8:2! Гэта нават не тэніс і не хакей! “Асіповічы” на такое не здольныя, яны больш стабільныя ў плане ліку.

.

Дарэчы, “Асіповічы” агоралі дома мастоўскі “Нёман”. Іўчанка забіў пераможны гол на 67-й хвіліне – 2:1. Можна колькі заўгодна гаварыць пра нестабільнасць і хісткасць “Асіповічаў”, але супраць фактаў лезці не рэкамендуецца – каманда займае 4-ты радок.

.

Гомельскае дэрбі “Гомельчыгункатранс” – “Гомель-2” скончылася дзякуючы голу Пінчука на карысць другіх. А вось слабейшы з гомельскіх клубаў “ХБК-2” абвяргае высновы пра заштатна-аўтсайдэрскі статус. Натуральна, вельмі позна, бо гамельчукі ўжо яўна не падымуцца вышэй за 17-ты радок, аднак як шыкоўна яны расправіліся з Лівадыяй” трэба было бачыць! Два галы лідэра атак гамельчукоў Аміна Кургхелі і адзін у выкананні Ігара Кавалёва знішчылі абарону дзяржынцаў – 3:0!

.

Матч ад каторага чакалі плоймы прыгожых галоў “Зорка-БДУ” – “Маладзечна” скончыўся ўнічыю 0:0 нягледзяы на спробы каманд нарэшце забіць.

.

Затое ў лідэраў не ўсё аказалася ў парадку. Калі “Клечаск” разарваў кола не вельмі ўдалых і няўпэўненых матчаў, абгуляўшы на выездзе “Оршу” 5:0, “Гарадзея” збольшага дзякуючы дублям Уладзіміра Макоўскага і Юрыя Сыраквашкі расправілася з “Вігвамам”, які канчаткова прымерыў да сябе статус аўтсайдэра, дык “Слуцкцукар” саступіў сціплай “Вертыкалі” ў Калінкавічах. Прычым усё ішло да нічыёй 0:0, часу заставалася няшмат, і тут, за 9 хвілін да канца прачынаецца напад “Вертыкалі”. Два асноўных бамбардзіры калінкавічцаў Чуб і Дулуб закатваюць два мячы ў вароты случакоў. Гол Якубоўскага за хвіліну да сцячэння часу нічога не вырашыў – 2:1. Дадзеная параза хутчэй за ўсё пакіне “Слуцкцукар” на трэцім месцы да канца чэмпіянату.

.

Цікава прасачыць і снайперскую спрэчку. Апошнім часам у ёй было маўчанне, цяпер жа Сыраквашка забіў два мячы, а Віскушэнка за свой “Клечаск” стаў галоўным “забойшчыкам” – хэт-трык! Такім чынам у Сыраквашкі ўжо 19 забітых мячоў, а вось Віскушэнка мае 20! Інтрыга не сціхае, яна трошкі большая за супрацьстаянне клубаў, “Гарадзея” апярэджвае “Клечаск” на 6 ачкоў. Да завяршэння застаецца 8 тураў.

.

Аўтар: Арцём Сізінцаў

.