Футбол. Чэмпіянат Беларусі ў другой лізе. 24 тур

Была нечаканасць. Не сенсацыя, а менавіта нечаканасць. Шклоўскі “Спартак”, які, так бы мовіць, без шанцаў саступіў у мінулым туры “Гарадзеі” неспадзявана “накрыў” у сябе дома пагрозлівую “Бярозу-2010” 2:0. Шклаўчане выйшлі наперад дастаткова хутка, пасля ўдару Пронцішава, а потым развілі поспех у выніку стрэлу Хадзянкова. У бярозаўцаў так і не знайшлося контраргументаў.

.

“Вігвам” забіў хуткі гол “Белтрансгазу” і ўтрымаў вынік, а “Вертыкаль” не здолела адкрыць лік у сустрэчы з “Лівадыяй”, для койданаўцаў і нулявая нічыя – здабытак. “Гомель-2” напрыканцы адыграўся ў матчы супраць “Маладзечна”, а “Асіповічы” доўга саступалі “Жлобіну”, аднак здолелі перамагчы. На стартавы ў гульне гол Сасіноўскага дублем адгукнуўся Лагуцін, але затым дубль аформіў Іўчанка, прычым свой другі гол Аляксей забіваў ужо на 2-ой кампенсаванай хвіліне.

.

Знянацку прайграла “Зорка-БДУ”, якая саступіла “Нёману” з Мастоў. Гульня зусім не забаўляла гледачоў небяспечнымі момантамі, а на 80-й хвіліне гол забіў мастовец Балейка. “Нёман” адсвяткаваў юбілейную, 10-ю  перамогу ў чэмпіянаце.

.

Сінхронна перамаглі лідары. “Клечаск” досыць упэўнена разыгрываў камбінацыі ў Гомелі у сустрэчы з  “ХБК-2”. А вось да канструктывізму справа ніяк не даходзіла. Фаварыту пашчасціла забіць за хвіліну да перапынку. Прыхільнікаў клечычанаў узрадаваў гол Усцьяна. Што ж, досыць прагматычна, але ж “Клечаск” спраўна збірае ачкі. “Слуцкцукар” таксама не зазнаў вялікіх праблем. Случакі на выездзе з “Гомельчыгункатрансам” выйшлі наперад яшчэ на 14-й хвіліне пасля ўдару Сікоры, за гэтым голам паследавалі яшчэ два ў выкананні Ліса і Ждановіча. Пырху ўдалося на апошняй хвіліне забіць гол прэстыжу. Відавочна, што гамельчукі гуляюць няблага, але вось запалу ў матчах з фаварытамі камандзе бракуе. “Гарадзея” пасля 9:1 у мінулым туры давала надзеі сваім фанатам на чарговую феерыю. Да таго ж супрацьстаяла “Гарадзеі” “Орша”, у якой не надта атрымліваюцца апошнія гульні. На 5-й хвіліне прыгожым ударам з сярэдняй адлегласці Мілеўскі адкрыў лік. Здавалася б, такі пачатак павінен здушыць “Оршу” і гарадзейцам удасца забіць яшчэ некалькі прыгожых галоў. Аднак не атрымалася. Нават лепшы снайпер чэмпіянату Юрый Сыраквашка, каторы з’явіўся толькі на замену не здолеў прабіць аршанскага варатара. У аршанцаў сур’ёзных пагроз варотам “Гарадзеі” не было, былі пераходы ў наступ, якія, зрэшты, нічым не завершыліся. Нялёгкая перамога пакінула “Гарадзею” яўным лідарам.

.

У 25-м туры буйных сутыкненняў толкам ня будзе. Адзінае, што “Слуцкцукар” мусіць моцна пастарацца перамагчы на сваім стадыёне “Зорку-БДУ”, армейцы злыя на тое, што ў іх крыху разладзілася гульня і паспрабуюць нарэшце перамагчы.

.

Аўтар: Арцём Сізінцаў

.