Чэмпіянат Беларусі. Агляд 28-га туру Другой лігі

Галоўнай падзеяй 28-га туру стала тое, што “Слуцкцукар” выйшаў на чыстае другое месца. Яшчэ ў мінулым туры пазіцыі “Клечаска” нечакана пахіснуліся, калі клуб не толькі не здолеў адкрыць лік у хатняй гульне з “Белтрансгазам”, а ў дадатак прапусціў гол пад канец сустрэчы. Цяпер жа клечычане саступілі ў цэнтральным паядынку “Гарадзеі”. Апошнія наблізіліся яшчэ на крок да першага дывізіёну, аднак не могуць пачувацца спакойна. Яшчэ матч з “Бярозай-2010” 26 верасня даказаў гэта. Віскушэнка мог прабіць брамніка гаспадароў са штрафнога – небяспечны ўдар быў адбіты. Зусім хутка стрэл Баранава Колбік няўдала адбіў перад сабой – і Тарлікоўскі адкрыў лік – 1:0 на карысць “Гарадзеі”. Таму ж кіперу гасцей не пашанцавала ў канцы першай паловы – Кандрашук невядома чаму груба згуляў супраць яго – другая жоўтая картка і выдаленне. Але і ў меншасці “Гарадзея” не перастала быць па-добраму хіжай. Гульня рукой ва ўласнай штрафной была пакарана з 11-метровай кропкі Тарліклўскім – 2:0. Тым не менш “Клечаск” атакаваў вельмі небяспечна і аднойчы дамогся свайго – Сялява па-майстэрску перакінуў брамніка гарадзейцаў. Калі стала хіліцца на заканчэнне матчу і госці зразумелі, што здабыць нічыю не атрымаецца, не стрываў Матарэнка. Гулец “Клечаска” кінуўся ў ногі Сыраквашку, паміж імі ўсчалася бойка, якая была неўзабаве спынена арбітрам. Матарэнка быў выдалены з поля, а ягоны клуб апусціўся на трэцяе месца.
.
“Слуцкцукар” узяў “свае” ачкі ў Гомеле, куды прыехаў да “ХБК-2” і такім чынам узняўся на другі радок.
.
Цікавым было саперніцтва клубаў, якія займаюць нізкія месцы ў табліцы, але пару разоў балюча “кусалі” фаварытаў – “Белтрансгаз”- “Жлобін”. Лагуцін на 53-й хвіліне прабіў Берга, але даволі хутка Жыгала зрабіў лік 1:1. Сустрэча так і скончылася, для слонімцаў гэта ўжо 10-я нічыя ў чэмпіянаце.
.
Па гэтым паказчыку дагналі “Белтрансгаз” “Зорка-БДУ” з “Вігвамам”. Калі армейцы могуць шкадаваць пра такі вынік, дык для “Вігвама” нулявая нічыя з “Бярозай-2010” – някепскі вынік. Зрэшты, для мінскіх армейцаў і такі вынік павінен лічыцца здавальняючым. Прапушчаны на пачатку другой паловы мяч ад “Гомельчыгункатранса” яны доўга не маглі адквітаць, а ўдалося гэта толькі на 94+ хвіліне! Ды й тое з пенальці дзякуючы дакладнасці Трапашкі.
.
“Спартак” пад канец матчу з “Нёманам” двойчы засмуціў мясцовага вартаўніка варотаў Крычэўскага. “Вертыкаль” саступіла “Гомелю-2” 1:2. “Орша” не здолела абгуляць “Лівадыю” – 0:0.
.
У наступным туры ў лідэраў адносна простыя матчы. А большыя праблемы якраз у “Клечаска”. Ён сустрэнецца дома з “Бярозай-2010”. Тут магчымы ўсе варыянты. Небагата варыянтаў у матчах “Слуцкцукар”-“Спартак” і “Жлобін”-“Гарадзея”. Тут фаварыты, напэўна, пастараюцца адкрыць лік рана і ўтрымаць яго. За 6 тураў да фінішу асечку могуць ужо не дараваць.
.
Віскушэнка застаецца лідарам бамбардзірскага рэестру з 20 мячамі. Не забіў у вочным супрацьстаянні фаварытаў не толькі Аляксей, але і Юрый Сыраквашка, у каторага застаюцца 19 галоў. Ягоны аднаклубнік Уладзімір Макоўскі накалаціў 18, а Сяргей Герасіменка з “Бярозы-2010” як і ўсе згаданыя не распарадзіўся дапамогай партнёраў, таму застаўся з лічбай 17 у дадзенай графе. А вось Дзяніс Вышынскі з “Маладзечна” адну з перадач аднаклубнікаў выкарыстаў, адкрыў лік у матчы з “Асіповічамі” і дасягнуў тым 16 забітых галоў. Дзмітрый Аніскевіч з-за траўмы дапамагчы партнёрам не мог, таму застаўся 13 забітымі галамі. Яго адсутнасць істотна перашкодзіла “Асіповічам” у 28-м туры, і яны саступілі 1:2. 13 мячоў таксама на рахунку Канстанціна Якубоўскага з “Слуцкцукра” і Іллі Давыдзенкі з “Клечаска”.
.
Аўтар: Арцём Сізінцаў